وصاتي إن غبت عنك تذكريني

ولا تنسين ما بينك وبيني

أنا يا روح روحي لو دقيقه

أبد ما غاب ذكرك صدقيني

خيا لك ما يفارقني ثواني

أبد ما يوم طيفك ما يجيني

عساك اليوم مثلي يا حياتي

مثل ما أرجيك مثلي ترتجيني

وصاتي لي تذكرتي وصاتي

تجيني يا بعد عمري وعيني

أنا ما ني ورب البيت ناسي

غرامك لو تضيق الأرض فيني

أنا مالي سواك اليوم غالي

ولا لك يا نظر عيني وزيني

عسى الأيّام تجمعنا حبايب

وأعبّر لك عن أشواقي وحنيني

ما دام القلب في حبك متيم

تراني دوم لعيونك رهيني

متى الأيام تصفي لي وأشوفك

وأقطف زهر بستانك بديني

وأغني لكل من مثلي تولّع

قصايد حب من جرح دفيني

وإذا ما صارت الدّنيا معانا

بعد فرقاك ما مثلي حزيني

يموت القلب من بعدك ولكن

وصاتي إن غبت عنك تذكريني