وين انت يا درب المحبّة تواريت

عن عين من مثلي توهّم وناداك

من يوم ما عنّي بلا ذنب صدّيت

أبكتب احلام القصايد بليّاك

انا المُحب اللي لوصلك تعنّيت

ما كنت اظنّك تتعب اللي تمنّاك

حتى جرحت احساس قلبي وفجّيت

قلب المُحب اللي نعم ما تناساك

يا درب يا درب المحبّة تجنّيت

على مُحبٍ وافيٍ كان ويّاك

يا ما عشقت اللي عشقت وتمنّيت

أسعد مع اللي بالمحبّة تعنّاك

لا شك يا درب المحبّة تخلّيت

عن كل من مثلي مُحبٍ تمشّاك

يكفيك يا درب المحبّة تخفّيت

مثل السراب اللي عن الناس خفّاك

لو كنت اعرفك ما عشقت وترجّيت

أفرح واغنّي واتبع اللي تغنّاك

يا كيف ابكتب واشطب اللي تناسيت

يا كيف ابنسى واكتب اللي ترجّاك

تعطف على قلبٍ تمنّاك وابطيت

عن جرحي اللي مابعد جرّب دواك

يا درب يا درب المُحبين ناديت

وين المحبّة والمُحبين ذولاك

اللي معاهم بالمحبّة تقهويت

من كأسك اللي بالمُحبين فتّاك

ردّ الجواب وبشّر اللي له أضحيت

مثل السراب لعاشقٍ ما تعدّاك

يا درب وين اللي معاهم تلاقيت

اللي دعوني واحدٍ من ضحاياك

جاوب على اللي قال مهما تدوايت

ماطابت جروح الزمن من سواياك

يا درب يا درب المحبّة تأذيت

من جرحي اللي دايم الدوم ينخاك

وين انت يا درب المُحبين ودّيت

أحبابي اللي ضيعوني بزواياك

مدري هم اللي ولعوني وتشقّيت

حتى غديت اليوم هايم بدنياك

والا انت يا درب المحبّة تعلّيت

فوق الغمام وغيّب الغيم ذكراك

لو ما كتبت اللي كتبت وتحرّيت

ردّ الجواب اللي يبيّن خفاياك

ما كان يا درب المحبّة تهنّيت

من سبّة اللي يا عساهم فدياك

اللي بهواهم ضيعوني وتعزّويت

باللي جفوني وتعّبوني بنوياك

لا تحسب اني بالمحبّة استقريت

يا من احاول اتبع ارضاك لارضاك

وين انت يا درب المحبّة تواريت

ردّ الجواب ولا تكثّر خطاياك