يا ليت اللي مضى من حب يرجع

على قلبٍ من الفرقى تقطـّـع

سبايب من تسبب في عذابي

حبيب في عذاب القلب بدّع

رجع لي من بعد فرقى طويله

وجبر قلبٍ من الفرقى تصدّع

ولكن صاحبي جدّد جروحي

وجعل عيني طوال الليل تدمع

زعل منّي وغاب الزين عنّي

وبلا ذنبٍ وليف الروح ودّع

تركني ضايعٍ في وسط بيتي

ولهيب النار الخفاق ولّع

أحاول أتصل في نور عيني

أريده بس يسمعني ويقنع

يا ليته بس جاوبني حبيبي

ولكن صاحبي صد وتمنع

إذا هذا الهوى الله يسامح

حبيبٍ في حبيبه ما توقّع

وعسى ربي يعين اللي سواتي

شراب البُعد من خلّه تجرّع

يقولوا لي جميع الناس أصبر

ما دام العشق ثلثينه تدلع

وأقول لكل من يسمع جوابي

ترى قلبي من الفرقى توجّع

وليفي لو طلب منّي حياتي

فداه الروح لو يرجع ويسمع

شعورٍ من شعور القلب طالع

قصيده قلتها من غير مطلع

أمانه يا نسيم الليل بلّغ

شعورٍ من شعور القلب يطلع

انا من هام في أغلى الحبايب

وعن الأحباب باب القلب شمّع

أبد مالي من الأحباب غيره

ولو زاد الجفا شهرين وأربع

أريده بس ما ينسى غرامي

ولا يبعد عن عيوني ويقطع

ومثل ما كان يستحمل عتابي

أريد الزين ما يزعل ويجزع

حبيبي هاك من قلبي قصيدة

من إحساس ٍ بعد فرقاك ينبع

شعور ٍ صادق ٍ من قلب صادق

على الأوراق للعشاق يطبع

قصايد عشق من قلبٍ تعذّب

أبد ما زاد فيها أو تصنّع

على اللي زينها زيّن حياتي

ولا لي غيرها بالحب مرجع

حياتي نور عيني ما سواها

لها غنيت من قلبٍ تمزع

أنا من قال بعد التجافي

يا ليت اللي مضى من حب يرجع