من ضيقةٍ في حنايا الصدر مكنونه

أعيت طبيب المحبّة لا يداويها

مرّيت (عرّافةٍ) بالفال مبخونه

تعرف خفايا الظروف اللي نعانيها

قالت لي اجلس هنا بحروف موزونه

والضيقة اللي بقليك لا تحاتيها

وفـ اللحظة اللي أحس الدار مسكونه

ومرّتني ازوال ما أعرف اساميها

قامت تتمتم ببعض اسماء مصيونه

وحطّت بخورٍ عسى ربي يعافيها

وقالت لي اسمع يا ولدي بنفس ممنونه

لازم تعرف الجروح اللي تخفّيها

مشكلتك انك تحب انسانة مزيونه

لكن من الصعب يا ولدي تلاقيها

ينبان عندي فـ هواك العذب مفتونه

وينبان عندي تبيها ودوم تطريها

وينبان عندي بـ بعض اشياء ملعونه

اهناك بعض الأوادم ما تدانيها

وقلوب بعض البشر بالغيض محقونه

وتحاول اكثر من احساسك تمحّيها

لكن نصيحة تراها فيك مجنونه

إياك تسمع كلام اللي يعاديها

معشوقتك من حلاها دوم معيونه

تبارك اللي بثوب الزين كاسيها

الخد الابيض يثير اللي يشوفونه

والشعر الاسود عن العالم يغطّيها

محبوبتك بالأنوثة حيل مشحونه

واللي يراها لك الله ما يخلّيها

ما تشبه الا الغزال وطرّة عيونه

أعظم صفات القصايد ما توفّيها

لكنّها فـ الحقيقة تعيش محزونه

ولا غيرك اللي من الدنيا يهنّيها

ثم اسكتت واجهشت بالدمع مغبونه

ثم انطقت وامسحت قلبي بـ اياديها

أمّا انت قلبك عساهم ما يحسدونه

ناسٍ عسى الله يا وليدي يجازيها

ينبان عندي أمورك دوم مركونه

ونفسك عزيزة عن الدنيا ومن فيها

ويمناك دايم على الاصحاب ميمونه

ومن جوفك الناس تسقيها وترويها

وتموت فيك البنات وفيك ممحونه

قيثارةٍ تسحر العالم بـ اغانيها

وينبان عندي عليك قلوب مطحونه

وان طعتني يا وليدي لا تحاكيها

وأطلقت آهة حزن فـ الصدر مسجونه

وأحسست في راحة احساسٍ بتاليها

وأيقنت طعم الغرام العذب وفنونه

من حاضر ايام عمري لين ماضيها

ما زلت اذوق الغرام وأعزف لحونه

للي عيوني على الدنيا تراعيها