لا تسافر يا حبيبي وتبتعد

وش يضرك لو تبي تقعد معاي

السفر يا صاحبي هم ونكد

ولو تروح يزيد يا خلي شقاي

في وجودك من حنانك استمد

ما يخليني من الفرحة بهناي

يا حبيب الروح .. يا وجه السعد

لا تروح أرجوك حقق لي مناي

شوقك اللي في ضميري ما ركد

ولو سمحت اليوم لا تخيب رجاي

لا تسافر وانتظرني للأبد

ولا تخليني أعاني من عناي

يا كحيل العين ... يا طعم الشهد

يا غناتي .. ياحياتي .. يا هواي

انتظر من هو على شانك قعد

بين حاير .. بين رايح .. بين جاي

شوف دمي في شراييني جمد

والقمر يا زين غادر عن سماي

لا تروح أرجوك يا أغلى وعد

وش يضرك لو تمعنت بنداي

يا حبيب الروح .. يا نور البلد

لا تروح إن كان ودك في رضاي

وامنحك يا صاحبي أثمن عهد

ما يحبك زود مخلوقٍ سواي