كتبت الشعر في أغلى الدراري

على ذيك المآذن والصواري

عقود ألماس في صقر الخليفة

حليف الطيب والعقد الوزاري

أبو سلمان مشهود الفعايل

على نهج الفرزدق والبخاري

لابن أحمد تعزويت القصايد

على أحدث موديلات الفراري

تحية عز من قصر الزبارة

نعم ما جات من باب الطواري

أسيّرها على اللي يحتريها

تطم سهول وجبال وصحاري

عسى الله يحفظ الخالد عضيدي

كثر ما فاضت سدود وغداري

من محرّق إلين أم المرادم

إلى عين الحسا والّا عذاري

عظيم إحسان وانصاف وعدالة

أريبٍ للأعادي ما يداري

على شانه عظيمات التهاني

أسيّرها على طوع اختياري

عسى شهر العبادة والتراحم

يمدّك من يمين ومن يساري

دعائم خير من أغلى الصحايف

سوات اللي لابو ذر الغفاري

شهر خير وفضائل سندسيّة

على نهرٍ من الإيمان جاري

عسى الله يحفظك يا تاج راسي

تصون العز والمجد الحضاري

نعم يا الخالد الشهم المضفّر

خيالك ما يُعد الّا اكتواري

يذكّرني دواعيس المُحرّق

سقاها الله فرجان وحواري

تذكّرني بشهر الخير دايم

خصوصاً لا تمشينا عصاري

نعم نشتم نفحات الأطايب

من اللي طيبهم ما هو تجاري

هل محرّق من شيوخ ونشامى

لهم في كل تاريخ اعتباري

لهم ( سلمان ) يا جزل الوفادة

كتبهم لين ما جفّت قصاري

لذلك جيت ما باب السموأل

أقدّم لك عظيمات الدراري