يا ليت الوقت لو يرجع ثواني

مع اللي ما هقيت انه نساني

رشيق القد، مفتون الملامح

شبيه الريم، مهيوب المعاني

كحيل العين، مليان الشفايف

عظيم الشوق، سلطان الغواني

ثقيل الروز، ريّان المفاتن

سقاني من الغرام اللي سقاني

خرافي الجمال الـ لا طبيعي

أبو خشمٍ شبيه الهندواني

هذاك الحب الأول في حياتي

عديل الروح، يشموم الأغاني

يذكّرني هواه أغلى المطاعم

على ذاك المكان الـ أولاني

تحت في (الغروب) اللي جمعنا

تذكّرت الغرام ومن دعاني

أهوجس فيه عذبات القوافي

وأرتل ما تيسّر من بياني

وليف الروح من طرّة جبينه

تشع الشمس وسهيل اليماني

يذكّرني هوى الدوحة وليفٍ

لحقته يوم ملّيت المكاني

نعم في فندق الواحة المميّز

تجاورنا الغرف ويّا الأماني

وكذا في مصر يوم انه طرالي

عنيت اللي من العالم شراني

وكذا ليمن تذكّرت الليالي

يذكّرني الهوى شهر رمضاني

هوى اللي في دبي اليوم ساكن

ولـ ادري ساكن بـ أي المباني

هذاك اللي إليمنّي طريته

أكيد إنه تذكّرني وطراني

يا ليت اعرف مكان اغلى الحبايب

عشان انصاه لا منّه قراني

وليفٍ كان ليمنا التقينا

نغيب وما يغيّبنا الزماني

هذاك اللي نعم عندي قناعة

براه اللي مثل حالي براني

وليفٍ لين ما جفّت عذاري

بكيت من الغرام اللي عصاني

على اللي يا عساني فدوةٍ له

وليفٍ ما هقيت انه نساني